„Би бил добар градоначалник на Град Скопје подеднакво како што сум добар градоначалник на Општина Кисела Вода“, вели Орце Ѓорѓиевски од ВМРО-ДПМНЕ. Но, веднаш потоа се оградува и дека изборот на кандидати за локалните избори кои треба да се одржат следната година ќе го направи раководството на партијата
Лидерот и партијата ќе ги одредат кандидатите, кажа за „360 степени“ и градоначалникот на Гази Баба, Бобан Стефковски. Но, додава, „подготвен сум за сите предизвици“
Ако се погледнат последните објави на Фејсбук-профилот на градоначалникот на Кисела Вода, Орце Ѓорѓиевски, лесно се стекнува впечаток дека е тргнат во мисија во другите скопски општини.
Неодамна имал средба со градоначалникот на Ѓорче Петров, Александар Стојкоски, за која Ѓорѓиевски пишува дека е „уште една од низата средби и разговори за поубави општини и Град Скопје“.
На 16 мај пиел кафе и јадел баклава со градоначалникот на Чаир, Висар Ганиу, а во објавата Орце Ѓорѓиевски вели дека „како и секоја општина на територијата на град Скопје, така и општина Чаир се соочува со проблеми, но и со опструкции од страна актуелното раководство на градот“.
Два дена пред средбата со Ганиу, на 14 мај, Ѓорѓиевски имал средба со градоначалникот на Бутел, Дарко Костовски. „Градските проблеми ќе ги решаваме заедно, Скопје заслужува да биде метропола која ќе се носи рамо до рамо со европските и заедно ќе стигнеме до таа цел“ – пишува во дел од објавата на Фејсбук.
Актуелната градоначалничка на Скопје, Данела Арсовска, дојде на функцијата со поддршка на ВМРО-ДПМНЕ, партијата чиј кадар е и градоначалникот на Кисела Вода, Орце Ѓорѓиевски.
Но, Арсовска и ВМРО-ДПМНЕ набрзо „раскинаа“. А со тоа се појавија проблеми во соработката меѓу градоначалниците на ВМРО-ДПМНЕ во скопските општини со Градот Скопје, како познатата битка за знакот „Кисела Вода“.
И денес Ѓорѓиевски тврди дека соработка нема.
„Скоро три години да влезете во конфликт со скоро се што е политичар во државата, а притоа ништо да не сработите и оправдување за вашето неработење и неспособност да барате секогаш кај другите, за мене во нејзе е проблемот. И мислам дека она треба да биде иницијативата која ќе биде покрената, да има отповикување на градоначалниците коишто не си ја вршат работата како што треба“,
вели Ѓорѓиевски.
На Ѓорѓиевски делумно му успеа да го намали влијанието на Арсовска пред околу година и половина, кога градоначалничката на Скопје беше разрешена од функцијата претседател на Управниот одбор на Заедницата на единиците на локалната самоуправа – ЗЕЛС. Нејзиното разрешување се случи едногласно, исто како што потоа едногласно Орце Ѓорѓиевски беше избран за нејзин наследник.
Токму со тоа што е претседател на ЗЕЛС, Ѓорѓиевски објаснува дел од последните активности. Дали, сепак, таа функција е и отскочна даска за кандидатура за градоначалник на Град Скопје?
„Вие може така гледате на работите, јас гледам малку поинаку… Oна за кое се залагам сега, знаете дека идниот премиер Христијан Мицкоски најави 250 милиони евра годишно поддршка за локалната самоуправа. Или тоа е една милијарда за четири години. Она што јас го правам во моментов е координација со моите колеги за тие средства да бидат дистрибуирани до последната општина во Македонија. А ќе се залагам и најмалата општина да може да реализира капитални проекти“,
вели градоначалникот на О. Кисела Вода.
Со речник на политичар, Ѓорѓиевски го обмислуваше одговорот за тоа дали е точна и јавната перцепција и шпекулациите – дека може да биде избор на неговата партија за кандидат за прв човек на Град Скопје на локалните избори в година.
На забелешката од 360 Степени дека не е тешко да се каже „Да, би бил градоначалник на Град Скопје“, Ѓорѓиевски одговара:
„Мислам дека би бил добар градоначалник на Град Скопје подеднакво како што сум добар градоначалник на Општина Кисела Вода. Не е добро самите за себе да зборувате, подобро е граѓаните тоа да го кажат но мислам дека евидентно е оти граѓаните се задоволни од нашата работа. Сепак, нашите партиски органи, ЦК и ИК ќе одлучуваат за таа постапка“.
Тој е можеби највидлив, но не е и единствен чие име се спомнува како можен претендент за најмоќната градоначалничка функција во државава. Во јавноста пред се е присутен со активности во својата општина, но Бобан Стефковски се смета за уште еден од потенцијалните кандидат за тоа место.
Ден по дебаклот на партијата на Данела Арсовска на парламентарните избори, тој и побара оставка од градоначалничката функција со зборовите „време е Скопје да се врати на скопјани“.
„Како општини кои припаѓаме на Град Скопје ние партиципираме со одредени финансиски средства во буџетот на Град Скопје, како што е наплата на комуналии – 60% одат во Градот Скопје, 40% остануваат во општината и јас бурно реагирам во сите наврати зашто дел од тие средства треба да се насочат во општините од кои пристигаат, односно да се реализираат за проектите и проблемите кои ги имаат граѓаните. За жал, сведоци сме дека овие две години немаме некој покрупен проект реализирано од страна на Град Скопје во Општина Гази Баба“,
рече Стефковски во изјавата за „360 Степени“.
Дали ова го мотивира Стефковски да влезе во трка за кандидат за градоначалник на Скопје и дали би му пречело да му биде конкурент на Ѓорѓиевски во внатрепартиската битка. Градоначалникот на Гази Баба вели – ќе ја почитува одлуката на највисоките партиски органи.
„Се уште е рано да се каже дали јас би се кандидирал за градоначалник на Скопје. Сепак, за тоа ќе одлучат раководни тела во партијата и, секако, претседателот Христијан Мицкоски ќе го донесе најдоброто решение за Град Скопје, меѓутоа, нормално, спремен сум за сите предизвици…Орце Ѓорѓиевски ми е едeн од подрагите колеги, ние како скопски градоначалници и сите останати постојано комуницираме и се коориднираме за реализација на одредени проекти во однос на практики што ги спроведува еден или друг градоначалник, така што ние во рамки на партијата не би навлегле во одреден дуел. Сепак, раководството на партијата, мислењето на граѓаните, анкетите итн., ќе дефинираат кој ќе биде кандидат за Градот Скопје“,
потенцираше градоначалникот на О. Гази Баба
До локалните избори има уште година и четири-пет месеци.
Од ВМРО-ДПМНЕ не одговорија на нашите прашања – дали се почнати консултации и мерења на рејтинзите на потенцијалните кандидати. Но, и без тоа се знае дека никој не може да биде избран ако не се обиде барем да покаже дека го посакува тоа.